Minse, minse waat hebbe vae schoeën daag achter de rug! Vae motten ut un bitje beknoptj umschrieëve, want ângers waerdj ut waal un hieël groeët verslaag.
Allerieërst ’s meirgus bee-eingekoome bee Paultje B. Un lekker teske koffie en wat beekalle. Dan ut joarlijkse schoeëleröndje. Vae waare achtereinvolgus oppe lieëgere schoeële van Roij, Muuëlenakker, Luuëke en Bosseve. Altieëd garant vör gezelligheid en leuke ontmoetingen met de toekomstige vastelaovundjveerders van Wieërt.
En dao zitten vae dan. Op unne zoondigaovundj met ut joggingspekske aan. Nog nao aan ut geneete van un paar leuke optrâejes vandaag. Mer……..waat un kepotmaakeri-j zegk!
Bee Huize Vaessen kwaame vae vanmâerge bee-ein. Frankie woor jaorig en dae noom dus un bekske beer en vlaai met. Nog effekes un dansje oefene vör oos nömmerke waat gester-aovundj doeër Rob is bedachtj. Det dansje gieët neet echt gelieëk, dus det wurdtj improvisiere. De oksels nog effekes glaad geschoore, want det haaje vae beloeëfdj. En belofte maaktj schuldj!
Dan…..op wieëg nao Don Bosco. Vae hebbe d’r zin in. Henk heitj os van herte welkom en zuirigtj good vör os. Zelfs aan de mosterdsop is gedachtj. Geweldjig.